MET Theo Paul Vorster
Ek hou baie van die driedimensionele kwaliteit om in die linoblok te kerf en unieke kunswerke te skep met lynwerk, helder kleure en ’n tematiese benadering. My werk vertoon altyd magiese kleur en energie en lok die kyker na ’n wêreld gevul met speelse drama.
Hierdie uitstalling is ’n versameling van mediums wat linoblokke, linodrukke, monotipes, argiefdrukke en beeldhouwerk insluit. Die werk handel oor ’n wêreld gebaseer op dié rympie: “If you go down to the woods today, you’ll be in for a big surprise.” Dit is ’n speelse verwysing na die woud en dinge wat daar gebeur waarvan ons onbewus is. Die werke is ’n metafoor van wat ons elke dag in ons eie omgewing beleef, aangebied in ’n tong-in-die-kies-styl. Dit verwys opsigself na hoe ons die alledaagse verfraai om dit meer draaglik te maak.
Besoek dié uitstalling van 23 tot 30 Maart tot 18:00 en op 31 Maart tot 14:00.
