MET Odette Graskie
Hierdie tekenervaring is ’n interaktiewe geleentheid met Odette Graskie. Odette nooi die gehoor om deel te neem wanneer sy portrette teken. ’n Opvoerende tekengeleentheid as ’n visuele kunsvorm ondersoek idees van bemiddeling, vertroue, die konvensies van portretkuns en die verhouding deur onderlinge oogkontak tussen vreemdelinge. Met ’n groter fokus op die vaslegging van die oomblik van die verbintenis tussen die kunstenaar en die model, word die natekening van die gelykenis ondergeskik gestel aan die emosionele en speelse lae betrokke by die interaksie. Die tekening word ’n vergestalting van die vlietende oomblik tussen die model en die kunstenaar.
Die portrette word deel van die kunstenaar se versameling sketse, wat verwerk en met die hand saamgestel word vir latere gebruik in saamgestelde beeldhouwerke. In ruil vir hul deelname, gee die kunstenaar aan diegene wat uitgebeeld word ’n fotografiese afdruk (van ’n beperkte oplaag) van een van haar kunswerke.
